هل انت قادر على المواجهه ؟؟

اكيد فى يوم حسيت ان فيه فار فى المطبخ او فى اى مكان تانى يعنى مش هى دى المشكله واكيد اعلنت حالة الطوارىء واطلقت صفارات الانذار ايذاناً ببدء حرب شرسه ستدور احداثها بعد قليل
بعد ان ترتدى سترتك العسكريه وتكمل تجهيز اسلحتك الحربيه زى ايد المقشه او شبشب مقاس 76 ا ولا ضير من مصيده شديده وفى عينيك اصرار رهييب على تأديب هذا الفار الذى تجرأ ودخل قلعتك المشيده واصرار كبير على اثبات رجولتك اما اهل البيت وهل من مناسبه انسب من هذه المناسبه لاثباتها ؟ بعدها تغلق الباب عليكما انت والفار يعنى المهم تبدأ فى البحث خلف الحلل او ما شابه وانت تقول بكل صرامه : اخلص يا معلم واطلع اصلك ميت ميت . وبصوت عالى علشان الناس اللى بره مستنين اخر اخبار المعركه يعرفوا ان فى وحش جوه ....... وعلى هذا ولا يهدى لك بال حتى ترديه قتيلا ... يا قلبك !
بس يا ترى الشجاعه والقلب الميت ده جه منين ؟ وياترى كان هيفضل ميت برضه لو فى مكان الفار ده اسد مثلاً ؟ ولا وقتها هتتقمص دور الفار وتستخبى ورا اي حله واشمعنى الشجاعه بتحضر على فار غلبان اخره يقرقض حته عيش ناشفه نسيتوها فى النمليه ويروح لحال سبيله لكنك لاتفوت هذه الفرصه لتؤكد لنفسك انك قادر على المواجهه فلماذا اذن يا قلب الاسد لاتواجه ظلم الحكومه والحزب الوطنى والظابط اللى بيستحل قفاك وقهر محبوبتك وقدرة الزمالك على رفع ضغط دمك؟ لماذا تترك كل هذا وتستقوى على حتت فار مسالم او صرصار لا بيهش ولا بينش حتى الفار كتير بيخوفك شكله وتدعى انه هرب ؟ لماذا نخاف اذن وعلى ايه وحنخسر ايه وللا احنا كسبنا ايه اساساً علشان نخسره بلا نيله !! تخيل بأه ان بعد ده كله تخرجلهم من غير جثة الفار ...يافضحتك ؟؟؟